Die grootste kersgeskenk

 

Die grootste kersgeskenk 

VDS Brink

Meneer Kersvader,

Takbokstraat 1

Noordpool

0000

Liewe Oom,

 

Toe ek verlede jaar skool toe gegaan het was juffrou Annie ons juffrou. Sy het my so mooi geleer en nou kan ek al goed skryf en vir oom die briefie stuur.

 

Oom, juffrou het so ʼn klomp witgrys hare gedra en sy het in ʼn klein huisie alleen buite die dorp gewoon. Sy het altyd vir my geroep en gesê, “Lydia, jy is die mooiste en slimste kind in ons skool, Lydia jy kan alles doen!”

 

Maar oom toe sê sy ook dat ek elke jaar vir oom dingetjies maar kan vra. Ek het nie poppe en bedjies soos die ander dogtertjies nie, net die goedjies wat die kerk elke jaar bring, maar dit raak gou weg.

 

Oom Kersvader, dit maak nie saak nie want weet oom, ek gaan mos eendag ʼn dokter word en dan sal ek almal se hartjies bly maak. Ek mag mos oom?

 

Juffrou het toe vir my klomp seëls en koeverte gegee sodat ek dit vir briefies aan oom kan gebruik. Sy het ook vir my oom se adres gegee. Ek verlang soveel vir Juffrou, sy is nie meer hier nie, sy is mos nou by Jesus ... en ek weet dat alles wat sy vertel het waar sal word.

 

Al die kinders is weg saam met vreemde mense wat hulle vir die vakansie kom haal het, net ek, Sarel met die mank beentjie en Paul met die leep ogie het oorgebly. Nou skree tannie Sara wat hier werk elke dag op ons. Hoekom oom?

 

Oom hoef nie vir my poppe en bedjies te bring nie, maar as oom en die takbokkies met oom se mooi slee opgestyg het en oom het almal se pakkies afgegee, dalkies kan oom hier ook ʼn draaitjie kom maak.

 

Asseblief tog oom?

 

Oom, ek voel sleg om vir oom so iets groots te vra, maar ek weet oom sal verstaan, ek wil net een ding vir Kersfees so graag hê, net een ding oom...

 

Dalk ʼn Mamma vir Kersfees ... ?

 

Liefste Groete,

Lydia Marais

 

Hoëveld Kinderhuis,

Witbank

Suid-Afrika

1043

Geinspireer deur my projek met Adriaan Bergh, meneer Suid-Afrika 2011, met sy wonderlike werk by die Jakaranda Kinderhuis.